O mellor supermercado do mundo

Aberto as vintecatro horas.

Gústame moitísimo este cestiño, tecido polo pai de Laura hai quen sabe cantos anos. Toda a froita que contén é agasallo dela.

Con cardamomo

Gustoume tanto este pan sueco, que probei por primeira vez a semana pasada, que estaba desexando acabalo para facer outro. Hoxe engadín tamén un chisquiño de cardamomo.

Á maneira tradicional

Máis pan á maneira tradicional. A receita é a de case sempre pero hoxe cocino na cocotte, por iso saiu así de bonitiño. Mágoa que nas fotos non se aprecie ben o ton dourado da codia.

INGREDIENTES para dous moletes*
750 g fariña de trigo do país (Panificadora Betanzos)
250 g fariña de trigo manitoba (La Finestra sul Cielo)
400 g masa nai de centeo branco
760 g auga [80%]
18 g sal [1,5%]

PREPARACIÓN
Autolise 30 min
Engado sal e amaso 25 min
Deixo levedar 3 h, cun S&F aos 60, 120 e 180 min
Frigorífico* unhas 10 h
Deixo temperar 2 h
Formo rapidamente.
Enfornado na cocotte* quente 240ºC 15 min tapada e 55 min a 200ºC co testo quitado.
Aseméllase moito ao pain au levain que comin en Francia.

* Dividín a masa en dous boles ao metela no frigorífico porque non tiña ningún grande dabondo para tanta masa.
Cocín a metade da masa na cocotte e o resto fóra, canda ela. O espazo no forno estivo moi xustiño.

Pan sueco de centeo

Velaquí outra das interesantísimas receitas de Ibán no Foro del pan:

Con fiuncho, tona de laranxa confitada e unha cantidade irracional de melaza. Non puiden agardar a mañán para catalo: é unha delicia, todos os sabores combinan á perfección e, sen dúbida, mañán ha mellorar.

Aínda que prescindín do lévedo comercial, pasóuseme un pouco porque tiña o forno ocupado.

Pan de peso

Fixen un pan con trigo do país como o da semana pasada. Saiu un molete tan alto que mesmo semella un pan de peso, dan ganas de cortalo en anacos grandes. O miolo é esponxoso e cheira ben.A verdade é que a forma é un pouco estraña (un coxín?).

A parte de abaixo ten un aspecto máis normal, de pan corrente.

Máis pan de pataca

Logo do éxito que tivo este pan a semana pasada, vinme na obriga de repetilo. Hoxe faltoulle algo de tempo de fermentación.
Por variar boteille por riba sementes de mapoula, que sempre van ben co pan branco.

Rye sourdough pancakes

Gústame moito esta receita, que collín de Wild Yeast, porque ainda que as tortitas son grosas non quedan masucas, saen cun miolo húmido e lixeiro.

INGREDIENTES para 7 tortitas
250 g masa nai de centeo branco
1 cullerada de mel (sirope de arce no orixinal)
1 cullerada de aceite
1 ovo
1/2 culleriña de lévedo químico (Royal)
1/4 culleriña de bicarbonato sódico
1/4 culleriña de sal

PREPARACIÓN
Mesturar todo e cociñar sobre a prancha lixeiramente engraxada. Dar volta cando faga burbullas.

Máis knäckebröd

Confésoo: son unha adicta.

La alegría de la huerta

As primeiras acelgas, os primeiros pementos, o primeiro cabaciño...

Intramuros

A horta en miniatura crece que dá gusto vela, é todo un espectáculo.

O mellor restaurante do mundo

Comedor ao aire libre, pan artesán e comida caseira. No menú de hoxe, repolo gratinado.

A verdura, máis fresca imposible: da horta ao prato en pouco máis dunha hora.

Pan do país

INGREDIENTES
500 g fariña de trigo do país
200 g masa nai de centeo branco
380 g auga [80%]
9 g sal [1,5%]

PREPARACIÓN
Mesturo todo agás o sal. Autolise 30 min
Engado o sal e amaso á Bertinet uns 20 min
Deixo levedar 3 h, s&F dentro do bol aos 90 e 180 min
Meto a masa no frigorífico unhas 9 h
Deixo temperar unhas 2 h
Envorco a masa sobre a encimeira enfariñada con centeo, formo e meto de contado no forno.
Enforno 15 min a 240ºC con vapor e uns 45-50 min máis a 200ºC

Pan branco de pataca

INGREDIENTES para un molde de 1,5 l
500 g fariña de trigo (RdS)
125 g pataca cocida no microondas
200 g soro de iogur
175 g auga
7 g lévedo fresco
7 g sal

PREPARACIÓN
Amaso todo xunto. Coloco nun bol e deixo levedar 1 h ou 1.15 h
Desgaso, meto nun molde engraxado e ao frigorífico.
Ás dúas horas crecera tanto que tiven que aplastalo para desgasarlo. Pasou toda a noite en frío e á mañán seguinte estaba tan desmandado que tiven que repetir a operación. Case que non tiña esperanza de que saise algo comestible.
Enfornei a 200ºC uns 50-55 min, os últimos 5-10 fóra do molde.

É moi tenro e ten un sabor suave e un cheiro dociño.

Knäckebröd de centeo, alcaravea e mel

Tunt, tunt.

Segundo a receita de Jan Hedh publicada por Ibán no foro del pan cuns axustes seus.
Que cousa TAN pero que TAN boa!

A toda caña!

Fixen un troco co Home de Folla de Lata, artesán cocinillas de grandísimo talento: unha botella de licor café caseiro á laranxa del por un frasco de licor de guindas caseiro meu de 2010. Nótase ben que este rapaz é un artista, obsérvese como se currou a presentación: botella, corcho, etiqueta (chulísima!) de deseño propio... non coma min, que botei todo nun tarro reutilizado, anotei o ano nunha mini-etiqueta e a correr. Oops.

Como vai bo tempo, ainda que é cedo xa hai guindas. Preparei algo de licor para o ano que ven, para consumo propio e trocos coma este que poidan xurdir. Estas son as cousas boas da vida :)

Marmelada de frambuesa

Como este ano a primavera está a ser tan morna, a froita toda ven adiantada. Collin unhas poucas frambuesas e fixen a primeira marmelada da tempada. Quedou un pouco espesa...

Pudding de pan

Cando vin esta torta di pane lembreime dunha bolsa de pan reseso que gardaba no conxelador e fixen unha versión 100% centeo. Había diferentes tipos de pan, os anacos de Borodinsky danlle un gusto especial.

INGREDIENTES
250 g pan reseso de centeo esnaquizado
700 g leite (botei máis porque me pareceu que a precisaba, non a medín)
2 ovos
50 g pasas
50 g noces
50 g azucre
unha cullerada de mel de caña

PREPARACIÓN
Remollar o pan no leite e deixar repousar toda a noite ou ata que o pan amoleza.
Mesturar o resto de ingredientes.
Verquer nun molde engraxado.
Enfornar a 180ºC 45-60 min

Dous anos de pan

Tras dous anos de pan caseiro, a panadeira aínda acena un sorriso parvo cando o pan sube ben no forno...

e máis se abre ben polos cortes...

e mentres arrefía fai crec-crec e se forman unhas fendiñas así pola codia.

Pan que sabe e cheira a pan :)


INGREDIENTES para un pansote de 1,3 Kg
750 g fariña de trigo (RdS)
300 g masa nai de trigo integral (RdS)
390 g auga [60%]
13 g sal [1,5%]
9 g malta moída de trigo [1%]

PREPARACIÓN
Mesturo todo. Autolise 30 min.
Amaso 6-7 min
Primeira fermentación 3 h, cun S&F cada hora.
Formo, coloco nun banetón enfariñado con arroz e meto no frigorífico 10 h
Saco e deixo temperar 2,5 h a temperatura ambiente.
Enforno sen pedra (non tiña tempo de quentala) 15 min con vapor a 240ºC e 55 min sen vapor a 200ºC

Aínda que é o pan de sempre (fíxeno deste xeito ducias de veces), hoxe saiu especialmente ben. Pode que sexa o mellor pan que fixen ata agora. Sabe a pan bo, artesán, cocido en forno de leña, cunha boa codia, que permaneceu dura ao longo das horas. E non sei por qué.

Kruskavel

Instrumento de tortura? Non! un novo xoguete. A ver se esta fin de semana o estreamos cun knäckebröd.

Ça marche!