26/5/12

Algo chamuscado

Unha versión deste delicioso pan. Queimóuseme un pouco porque andaba entretida noutras tarefas. Ainda así, cheira e sabe moi ben.

Trigo


Unha espiga soa, apareceu canda a porta da casa. Traería a semente o vento? un paxaro?

24/5/12

Unha rosca para o almorzo


Unha rosca doce (pouco doce) sen complicacións para o almorzo.

INGREDIENTES
500 g fariña de forza (Haricaman)
250 g leite morno infusionado con canela, vainilla e cardamomo
50 g manteiga cocida
60 g azucre amarelo areado portugués
2 ovos
5,5 g lévedo seco (un sobre de Maizena)
un chisco de sal
un pouco de azucre para adornar
tona de limón confitada

PREPARACIÓN
Mesturar todo menos os ovos, incorporándoos cando xa estea a medio amasar.
Deixar levedar cousa de 1 h
Incorporar a tona de limón feita anaquiños, formar unha rosca, pulverizar auga para que non seque e deixar levedar outra vez.
Humedecer moi lixeiramente o azucre e colocalo por riba da rosca.
Enfornar 25-30 min (non me acordo) a 180ºC, cuberto case todo o tempo con papel de aluminio para que non colla demasiada cor.

17/5/12

Deluxe


Para moitas persoas falar de comida de luxo significa marisco ou cousa semellante. Para min trátase máis ben disto:


Ensalada da horta, con leituga folla de carballo e rabanitos acabados de apañar, noces e mazá. Todo de casa menos a mazá, que aínda non hai.

De luxo.

Xa?!


Millo corvo e faba vasca. Boteinos hai dez días e xa están así, non é incrible?

Ah, e os altramuces que me deu Adriana, crecen tan á presa que case se pode apreciar a simple vista.


Púxenos na terra esta tarde.

4/5/12

Bollu preñau vexetarianu

 
 
 
 
 
 

A receita deste mes no foro do pan é o bollo preñau e a min prestoume inventar unha versión sen carne.

O recheo é seitán caseiro (receita aquí). Fíxeno con 500 g de fariña candeal e cocino con sidra, allos, sal e pemento doce e picante. Deixeino repousar dous días no líquido da cocción e logo escurrino, piqueino, adobeino e fritino coma se fose zorza.

Fixen unha masa enriquecida para que resultase máis tenra. Boteille:
200 g fariña candeal
120 g leite
27 g crème fraîche caseira
3 g sal
1 g lévedo seco


Amasei nun bol, deixei levedar cousa de 1 h e pico, estirei, puxen o recheo e deixei levedar 1 h máis.
Enfornei 30 min a 200ºC

Fóiseme un pouco a man co sal e co picante (nada grave) pero polo demáis saiu incriblemente bo.

Sementar, sementarei


Millo corvo e fabas vascas, agasallo dunha persoa creativa e xenerosa.
Estou desexando que chegue o domingo para botalas na horta.