...Frangullas polo chan...

Knäckebröd achicharrado

2012-01-23T17:54:00.002+01:00

Hai que ter un coidado con este pan... non ben te despistas un instante, achichárrase no forno.

Medio queimado e todo, conserva a súa potente capacidade adictiva. É sen dúbida ningunha o pan máis adictivo que coñezo.

Xabón

2012-01-23T17:52:00.001+01:00

Si: xabón 100% aceite de oliva, feito a man, por que non?

Mira que son parva

2012-01-22T19:59:00.002+01:00

Nunca plantara coliflores, fíxeno por primeira vez a finais de agosto ou comezos de setembro coa idea de telas para noiteboa. Daquela non creceran aínda dabondo e tivemos que comprar unha para a cea. Agora xa se decidiron a engordar e a min faime ilusión velas así de bonitas :)

Das Brot.

2012-01-21T21:12:00.006+01:00

Partindo unha vez máis do wholegrain rye bread de Lepard (The handmade loaf, p. 85) e modificándoo ao meu gusto, cruzándoo co sour 100% rye bread (p. 31) e tamén estoutro, fixen un pan tipo alemán:

INGREDIENTES para dous moldes de 1,5 L
400 g masa nai de centeo
800 g centeo en gran partido e cocido
500 g fariña de centeo
300 g malta en infusión (cebada tostada caramelizada)
2 culleriñas de sal
2 culleradas de mel de cana
2 culleradas de sirope de cebada

PREPARACIÓN
Mesturo todo e deixo repousar 1 h
Verco a masa en dous moldes empapelados e engraxados.
Deixo levedar toda a noite no frigorífico e cousa de 4 h a temperatura ambiente (evidentemente foi pouco, porque rebentaron).
Furo cun espeto e pinto cun engrudo lixeiro de maizena (The handmade loaf, p. 187).
Enforno 1 h a 200ºC.
Doulles outra pincelada ao sacalos do forno para que brillen ben.

Wholegrain rye bread tuneado

2012-01-15T10:27:00.003+01:00

Fixen un wholegrain rye bread (Dan Lepard The handmade loaf, p. 85) modificando un pouco a receita:

Non puxen lévedo comercial, so masa nai.
O gran estaba máis ou menos partido (era schrot caseiro) e de maneira irregular: contiña gran partido, algún enteiro e fariña basta. O resultado de cocelo sería máis ben un Quellstück.
Aumentei a cantidade desa pasta e non medin a auga que contiña.
Engadín cousa de medio vaso de kéfir porque me pareceu que a masa precisaba máis humidade.
O pan levedou toda a noite na terraza (aprox. 9 h a 9ºC) e despois na cociña (aprox. 3 h a 16º C), tería precisado algo máis.
Tíveno no forno 65-70 min e non lle sobrou nada.
Vernizeino antes de metelo no forno e cando o quitei cun engrudo moi lixeiro de amido de millo (Maizena). Na foto non se aprecia pero o resultado é es-pec-ta-cu-lar.

Agora estou marinando un salmón para que lle faga compaña.

Bocata en Picos

2012-01-07T19:57:00.002+01:00

Nos Invernales de Igüedri, no camiño (GR-202) que vai de Espinama a Sotres, a uns 1350 m de altitude.

O pan tan malo como boa a compaña: buitres e rebecos. Das vistas non fai falta que diga nada :)

Almorzo de reis

2012-01-06T07:00:00.002+01:00

Na mañá de Reis almorzamos coma reis: chocolate cun rico roscón artesán, cortesía de David e Rosa.

Bocata na fervenza do Asón

2012-01-03T21:30:00.000+01:00

Aquí nace o río. Unha marabilla de lugar.

Xantar de aninovo

2012-01-01T20:37:00.005+01:00

Bocata nos bosques de Ucieda, no Saja, en Cantabria. Percorrendo o PR-S 111.

Fabas conxeladas

2011-12-25T19:39:00.004+01:00

Estas fabas, que naceron haberá tres ou catro días, non se deixan asustar pola xeada. Nos tampouco: un día espléndido para desfrutar dun paseo polo campo.

Empanadico 2

2011-12-21T16:37:00.002+01:00

Repetín o empanadico. Nesta ocasión vai recheo de cabaza xunto cunha boa cantidade de sésamo e non leva azucre por riba, polo demáis é igual. Este quedou mellor cocido, máis seco e crocante, porque foi ao forno na bandexa que se ve na foto, que se quenta ben e dalle calor por baixo. Ah, e o arró desta maneira, sellado cun garfo, queda máis fino, prefíroo así.

Empanadico de calabaza

2011-12-15T15:50:00.002+01:00

Baseado na receita da familia aragonesa de Cecília:

INGREDIENTES para unha bandexa de 30 x 40 cm
Para a masa:
200 g auga
100 g azucre de cana
100 g aceite de oliva
1 cullerada de anís en gran
400 g fariña (puxen 285 g de trigo candeal e o resto integral)

Para o recheo:
500 g cabaza cortada fina
azucre de cana
canela

PREPARACIÓN
Mesturar a auga co azucre, o aceite e o anís. Cocer 10 min e verter sobre a fariña.
Amasar e logo deixar repousar 5 min
Estender a metade da masa ben finiña sobre un papel de forno.
Cubrila coa cabaza e espolvorear con azucre e canela.
Tapar co resto da masa.
Sellar ben os bordes, facer un burato no medio e pinchar toda a superficie para que non inche no forno.
Esparexer azucre e canela por riba.
Enfornar a 180º-200ºC uns 45 min

Se sobra masa pódeselle dar forma de tortas e enfornar soas (sen recheo), saen case idénticas ás tortas de aceite de Inés Rosales.

PLC

2011-12-14T16:48:00.004+01:00

Pan, lacón asado, chucrut (todo caseiro, obviamente): pode haber unha combinación mellor?

Bocata en Parga

2011-12-08T18:28:00.004+01:00

Percorrendo o PR-G 99. Unha paradiña para darmos boa conta dos bocatas na carballeira de Parga.

Bagels

2011-12-06T09:37:00.002+01:00

Hamelman, Bread, pp. 260-261.

Morcillas en boa compaña

2011-12-05T18:46:00.014+01:00

O mellor non é termos a sorte de aprender de primeira man como se fan as morcillas, é compartirmos unha fin de semana con xente tan boa e acolledora.

Grazas, Encarna. Grazas, David.

Pan sueco de centeo con melaza, anís e laranxa

2011-11-27T09:57:00.002+01:00

Fíxeno onte, abrino hoxe. Deste pan gústame todo: textura, color, sabor, aroma...

Un pouco de todo

2011-11-26T15:10:00.005+01:00

Velaquí unha pequena mostra do que saiu hoxe do forno:

O de atrás é knäckebröd (tunt, tunt) de centeo, alcaravea e mel; o de diante á esquerda un pan branco (quen o diría!) de trigo e lévedo (pouco: 0,25 g para 1 Kg de fariña) e o da dereita un riquísimo pan sueco de trigo e centeo, doce e especiado.

Bocata no Caurel

2011-11-20T19:42:00.004+01:00

Que mellor maneira de pasar un domingo que pasear tranquilamente entre castiñeiros?

Sempre se atopa algo :)

Que sorte, castañas asadas para cear. Están boas!

Ris ras

2011-11-19T12:13:00.003+01:00

Estreo lame, que é este trebello de alta tecnoloxía:

Parece que funciona ben.

Almorzo de outono

2011-11-19T12:06:00.004+01:00

Para almorzar hoxe, panqueques cunha marmelada que non pode ser máis de outono: leva cabaza, mazá e noces (todo da horta), tamén un pauciño de canela, zume de limón e azucre de cana. Fíxena onte, non quedou moi doce, pode que vaia collendo máis sabor co paso dos días e non se lle note a falta de azucre.

Sunday roast, Monday tasty toast

2011-11-14T16:30:00.002+01:00

With homemade mustard.

With homemade chutney.

Á vaiche boa

2011-11-12T15:55:00.003+01:00

Velaquí un pan de trigo do país e masa nai completamente a ollo, sen pesar nin medir nada, sen calcular porcentaxes de hidratación nin lerias.

Día de experimentos

2011-11-12T13:10:00.008+01:00

Hoxe é día de experimentos ou, mellor dito, de xogar un pouco na cociña. Preparei unha masiña sinxela con fariña, cabaza, leite, un pouco azucre, especias e un chisco de lévedo.

Amasei e deixei levedar 90 min, logo metin a masa no frigorífico toda a noite.

Pola mañán dividina en dous. Cunha parte fixen este boliño, que foi ao forno:

E coa outra parte fixen unha especie de baozi que coceron na vaporeira:

Quedaron ricos, suaves, lixeiros e esponxosos (aínda que na foto non o parecen). A cor era moi bonita, na foto saen así de desmellorados porque está feita co móvil, tiña a cámara sen batería. Rebentaron ao coceren, nunca me pasara. Terían precisado máis repouso.

Os ingredientes da masa común son:

360 g fariña candeal (Froiz / Gabino Bobo)
50% cabaza cocida (no microondas para que non colla auga)
5% azucre moreno
algo menos do 60% leite
0,3 % lévedo seco
canela
cravo moído
noz moscada
xenxibre fresco ralado
un chisquiño de sal

Xa para rematar, cunha pouquiña cabaza que me sobrou, improvisei unhas gominolas feitas con amido de mandioca (polvilho doce):

Non é que estean malas, pero a min todo o que leva amido de mandioca sábeme a pão de queijo. Un sabor curioso.

Sobremesa caseira

2011-11-10T15:38:00.002+01:00

Pan, queixo e noces de casa. So nos falta o mel: se cadra, para o ano haberá que pensar nas abellas.

Cogumelos

2011-11-06T21:28:00.017+01:00

En calquera momento do paseo pode xurdir unha sorpresa. Sempre se atopa algo cando se mira con atención.

Máis semolina bread

2011-11-06T12:28:00.003+01:00

Hamelman, Bread, p. 171.

Blue cheese and oatmeal biscuits

2011-11-06T12:24:00.002+01:00

Dan Lepard, Short & Sweet, p. 256.

Sidra

2011-11-01T20:55:00.014+01:00

Así ferve cinco días despois:

Tras dúas semanas ten este aspecto:

Ás catro semanas, a superficie presenta este aspecto:

A piques de cumplir dous meses:

Con case tres meses está así:

Apple pancakes?!

2011-11-01T09:55:00.005+01:00

Hai uns días puxen a remollo a tona de dúas mazás para cultivar o lévedo. Ocorréuseme disolver na auga un par de culleradas de sirope de cebada, pensei que o azucre sería alimento para o lévedo e ademáis deulle unha cor bonita, dun dourado escuro.

Onte collín parte dese lévedo líquido, mestureino con fariña branca de trigo e deixeino toda a noite. Esta mañán estaba cheo de burbulliñas, ben fermentado, cun cheiro entre viño e froita. Engadín un chisco de sal, un pouco Royal, remexín ben e botei culleradas desa masa (unha papa, máis ben) nunha tixola enmanteigada. Et voilà, esponxosos e afroitados pancakes para almorzar:

O outono é tempo de te

2011-10-31T17:18:00.004+01:00

O pracer de beber devagariño cunca tras cunca de te mentres a tarde transcurre preguizosa e fóra cae a choiva.

Á maneira do mestre ;)

Semolina bread

2011-10-29T15:05:00.003+02:00

Hamelman, Bread, p. 171.

Do país

2011-10-29T14:58:00.004+02:00

Este ano temos moitas e boas noces e aínda non fixera un pan con elas. Fíxeno hoxe con trigo do país, tamén a masa nai (non me quedaba centeo). Está bo, pero bótaselle en falta o centeo :,(

Chilacayote 2011

2011-10-25T18:12:00.005+02:00

Os primeiros tarros da tempada, con canela e cravo coma o ano pasado. Acabadiños de facer, coas etiquetas aínda húmidas.

(Que ben soa «chilacayote», moito mellor que «doce de gila» ou «cabello de ángel».)

Ensaio xeral

2011-10-25T17:53:00.001+02:00

Chucrut con mazá, puré de patacas, salsa de oporto e lombo de porco asado.
Canto me gusta o outono! :)

En bolas!

2011-10-24T21:57:00.003+02:00

Hoxe, cea brasileira en pelotas: quibe e pão de queijo :)

Pan de molde rebentón

2011-10-22T16:06:00.003+02:00

Non hai maneira de que me saia ben o pan de molde, sempre rebenta por un lado, normalmente o esquerdo . Supoño que se debe a unha combinación de factores: formado deficiente, pouca fermentación, o forno que distribúe mal a calor...

O de hoxe non foi unha excepción :(

A receita baséase no simple milk loaf de Dan Lepard, o meu pan de molde de cabeceira.

INGREDIENTES
500 g fariña de trigo candeal Froiz (Gabino Bobo)
320 g leite
100 g nata caseira (crème fraîche, ben ácida e con cheiriño a queixo)
20 g mel
2 g lévedo seco
7 g sal

PREPARACIÓN
Amaso todo xunto 5-7 min
Deixo levedar 1 h
Meto no frigorífico toda a noite.
Pola mañán deixo temperar, formo e coloco nun molde moi ben (se cadra de máis) engraxado.
Deixo levedar e enforno a 200ºC 55 min cuberto con papel aluminio e 5 máis fóra do molde.

Improvisando

2011-10-22T13:40:00.004+02:00

Un pan dos que a min me gustan.

INGREDIENTES
300 g centeo medio partido + 300 g auga fervendo
300 g fariña de trigo integral (RdS)
300 g masa nai de trigo integral ao 100%
150 g auga
11 g sal

PREPARACIÓN
Escaldo o centeo e déixoo repousar unhas horas.
Mestúroo co resto de ingredientes.
Deixo levedar 1.30 h (ou 2 :? é que non mirei a hora).
Formo un bâtard, enmoldo, enfariño ben por riba e meto no frigorífico toda a noite.
Pola mañán sácoo e déixoo temperar unhas 3 h (tampouco estiven pendente do reloxo).
Enforno a 200ºC 55 min e 10 máis sen molde.

Salted oat crackers

2011-10-22T13:34:00.003+02:00

Receita de Dan Lepard publicada en The Guardian.

Paciencia (2)

2011-10-22T13:31:00.003+02:00

Xa van alá case dous meses. O gran día está a piques de chegar.

Reciclaxe resultón

2011-10-21T17:04:00.006+02:00

Hoxe nin a man nin amodo: un resto de pisto, unha placa de masa follada comprada, un pouco queixo por riba, vinte minutos no forno e xantar preparado.

Pouco sofisticado pero enche o bandullo :)

Quibe assado

2011-10-20T22:06:00.009+02:00

Coa receita de Vera:

2 cups (aprox 200 g) bulgur gordiño (non tiña trigo específico para quibe)
500 g carne de vitela picada
750 g auga fervendo
unha cebola picada
un pouco de aceite
unha cullerada de sal
pementa negra, canela, cravo, noz moscada
1/2 cup hortelá (hierbabuena)

Remollar o trigo coa auga ben quente ata que a teña absorbido toda.
Mesturar o resto de ingredientes.
Formar boliñas e enfornar (eu tívenas 30 min a 200ºC)

Con estas cantidades sae moitísimo quibe. Eu fixen 40 boliñas e gardei parte no conxelador, aínda crúas, para outro día.

Unha boa fornada

2011-10-15T14:12:00.006+02:00

Hoxe o forno traballou arreo. Primeiro un pan de molde, seguindo máis ou menos de perto a receita do simple milk loaf de Lepard (The handmade loaf, p. 46), que nunca falla.

Usei fariña candeal marca Froiz, de Gabino Bobo. Gústame como quedou o miolo, en cambio por fóra deixa moito que desexar. Non son quen de facer un pan de molde ben feitiño, sempre abren por un lado ou polos dous :(

Este pan compartiu forno cun Holzofenbrot que fixen ollando de esguello para a receita do foro pero sen prestarlle moita atención e improvisando un pouco.

Na foto non se aprecia o plano que saiu, case unha torta. De todos xeitos é un pan moi agradecido e ha de estar bo.

E, xa para rematar, unha strata (baseada nesta) para aproveitar un pan de centeo que levaba meses no conxelador agardando que fixese algo con el.

Oatcakes con queixo Valdeón

2011-10-13T16:13:00.003+02:00

Aperitivo mentras aquece o borscht: o queixo azul que trouxemos da escapada a Picos cunhas oatcakes caseiras.

Máis borscht

2011-10-13T16:06:00.001+02:00

Hoxe máis encarnado, espeso e saboroso. Mágoa que o tempo non acompañe.

Viño

2011-10-10T16:55:00.003+02:00

Si: viño, mosto fermentado. Sen máis, así de primitivo e sinxelo.

Pan de trigo integral con lévedo de mazá

2011-10-02T15:36:00.003+02:00

Gustoume o pan con lévedo de froita que fixen a semana pasada. Hoxe fixen de novo pan con este lévedo (refrescado ao longo destes días con tona de mazá) e nada de auga, todo o líquido que contén a masa é este lévedo líquido de cheiro afroitado. Ademáis preparei un prefermento co 50% da fariña para darlle máis carácter ao pan.

INGREDIENTES
Prefermento
500 g fariña integral de trigo (RdS)
300 g lévedo líquido [60%]

Masa principal
Todo o prefermento
300 g farina integral de trigo
200 g fariña de trigo
350 g lévedo líquido [70%]
15 g sal [1,5%]

PREPARACIÓN
Preparo o prefermento e déixoo 12 h a temperatura ambiente.
Mesturo o prefermento co resto de ingredientes, amaso uns 3 min e deixo levedar 3 h
Divido, formo e coloco en banetóns enfariñados con centeo.
Deixo levedar 1 h
Enforno 20 min a 240ºC con vapor e 30 min máis sen vapor a 200ºC
Repousan no forno quente apagado coa porta entreaberta.

Abóbora no forno

2011-10-02T12:53:00.003+02:00

É incrible o que está a dar de si a mini horta. Ela condiciona en boa medida os nosos menús, cociñamos segundo o que haxa dispoñible. Hoxe inventei unha receita de cabaza rechea con cebola, cogumelos negros (Auricularia polytricha), okara, cacahuete, sésamo e curry.

Galletas integrales con uvas

2011-10-02T12:50:00.002+02:00

Unha versión destas galletas, hoxe con trigo integral e uvas e sen limón. Engadín un pouco de soro de leite porque a masa precisaba máis humidade.

Estraño comezo de outono

2011-10-01T22:13:00.004+02:00

Estraño comezo de outono, con temperaturas de verán e almorzos de verán... sen que deixe de ser outono.

Борщ

2011-09-28T16:19:00.003+02:00

Rico e sinxelo borscht de remolacha fermentada, pataca, cebola e cenoura con crème fraîche.
Receita de Wild Fermentation, tamén coñecido como «o libro dos tolos».

Un tesouro

2011-09-25T20:40:00.005+02:00

Fun a Ponte Aranga, andaba na procura dun muíño no Mandeo e atopei este tesouro. A xenerosidade da natureza no outono é abraiante.

Disque está de moda apañar comida silvestre: amoras, cogumelos, avelás... o que se fixo toda a vida, vamos. Puxéronlle mesmo un nome: foraging.

Cada día entendo menos a modernidade.

Teta

2011-09-24T17:14:00.003+02:00

«At the end of the meal the waiter would have had us prove his epicurism and ours by choosing Edam or Gruyère, but we insisted on the cheese of the country and had our reward, for it was perfect, creamy white, rich, smooth, and with a delicate sourness most satisfying and refreshing. Made of cow's milk, the cheeses were round and flat or round and pointed. The startling likeness to a woman's breast was acknowledged in the name, queso tetilla or de teta, spoken without the slightest hesitation. Or was it perhaps spoken with the least edge of malice to try our supposed Nordic prudery?»

Ruth Matilda Anderson, Gallegan provinces of Spain. Pontevedra and La Coruña, New York, The Hispanic Society of America, 1939, p. 374.

Pan con tres fermentos

2011-09-24T13:35:00.013+02:00

Este pan está levedado con tres fermentos: soro (de leite acidificado con kéfir), lévedo seco e lévedo líquido de froita.

INGREDIENTES para dous moletes
1 Kg fariña de trigo ecolóxica (RdS)
650 g soro de leite (sobrante dun queixo)
50 g prefermento de lévedo de froita e fariña integral de trigo ao 100% (sobrara destoutro pan e dábame pena tiralo)
1,8 g lévedo seco (o que quedaba nunha bolsiña)
15 g sal

PREPARACIÓN
Amaso todo xunto.
Deixo levedar dúas horas e meto no frigorífico toda a noite.
Deixo temperar media hora, divido e preformo.
Agardo 30 min e formo.
Deixo levedar pouco máis dunha hora e enforno 15 min á máxima temperatura con vapor e 40 min máis a 220ºC sen vapor.

Pan con lévedo de froita

2011-09-23T18:45:00.018+02:00

Desde que lin no foro do pan os experimentos de Mag co lévedo líquido de froita quería probar esta curiosa maneira de facer pan. Agora que teño froita caseira dabondo é un bo momento. Puxen nun vaso con auga unha presada de uvas un pouco aplastadas e uns anacos de tona de mazá.

Ao día seguinte xa había burbullas e cheiraba ben: dociño, afroitado e alcohólico, é dicir, a licor de guindas! :D

En vista de que a cousa marchaba, mesturei unha pouca auga co mesmo peso de fariña de trigo integral e agardei a ver que pasaba.

Tamén mudei o vaso do líquido que quedaba por un frasco máis grande, quitei a froita (que xa levaba dous días en remollo) e botei máis tona de mazá.

A temperatura na cociña estaba arredor dos 23ºC

Funcionou! Estas burbulliñas tan prometedoras amosaban que o lévedo prosperara. Era o momento de poñerse co pan.

Preparei un prefermento con:

50 g deste starter
100 g auga mineral
100 g fariña de trigo integral ecolóxica moída en pedra (RdS)

Despois de 3 h estaba así de bonito:

Decidín preparar un pan sinxelo con:

500 g fariña de trigo ecolóxica moída en pedra (RdS)
200 g prefermento
260 g auga [60%]
9 g sal [1,5%]

Mesturei todo menos o sal e deixei repousar a masa 30 min
Engadín o sal, amasei moi brevemente, deixei levedar 2 h e despois metino no frigorífico toda a noite, unhas 9 h

Pola mañán saqueino, deixeino temperar media hora e formei unha barra grandota. Ben feitiña, eh? Pois non, como comprobaría máis tarde.

Deixeina repousar 1:15 h e enfornei. Non sei por que non puxen a pedra no forno, tería sido de axuda.

Enfornei á máxima temperatura con vapor 10 min e 30 min máis a 200ºC sen vapor.

As greñas están lonxe (moooi lonxe) de ser perfectas pero en xeral o pan presenta un aspecto aceptable:

Ben mirado, saiu ata favorecido:

... aínda que non desde todos os ángulos. Isto é o que sucede cando non se sella ben o pan e por riba se greña mal:

O pobre non puido crecer ben e rebentou por onde puido.

Nótaselle a falta da pedra na codia tan fina que formou por abaixo. Por sorte o miolo está bastante ben:

É un pan esponxoso e de sabor suave, no que se percibe (pode ser a miña imaxinación, pero eu xuro que o noto) un lonxano gusto a mazá.

Queixo 3, día 12

2011-09-23T15:15:00.001+02:00

Non sei que tal estará, pero a pinta é de queixo de verdade :)

Estoulle collendo gusto a isto do queixo, xa teño outro en marcha.

Potaxe canario de cabaza

2011-09-21T15:06:00.004+02:00

Con cabaza, acelgas, pataca, cebola, allo, tomate e fabas. Boa parte dos ingredientes proveñen da horta.

Que viva a culler!

Wholegrain, wholerye

2011-09-18T10:19:00.004+02:00

Por máis que o furo sempre rebenta no forno :(

A receita é de Dan Lepard, «Wholegrain rye bread», The handmade loaf, p. 85. O único cambio que fixen foi trocar a auga por soro de leite e tamén o gran cocido está remollado en soro, teño abondo desde que fago queixo.

Foto de familia

2011-09-17T16:10:00.002+02:00

Velaquí tedes os tres xuntiños. De esquerda a dereita: queixo 4, día 1; queixo 3, día 6; e queixo 2, día 14. Non sei se é amor de nai pero melloran de día en día.

Gallegan provinces

2011-09-17T16:06:00.003+02:00

Onte á noite recibín un agasallo que me fixo moitísima ilusión: un exemplar do Gallegan provinces of Spain: Pontevedra and La Coruña, de Ruth Matilda Anderson, publicado en 1939 pola Hispanic Society of America en Nova York.
Menuda sorpresa! :)

Queixo 2, día 11

2011-09-14T17:04:00.003+02:00

Non é que sexa o mellor queixo do mundo pero déixase comer.

Teplá jídla po celý den

2011-09-12T16:33:00.004+02:00

Fixen uns knedlíky para mollar no prebe do xarrete guisado. Acabei tan aburrida deles na R. Checa que se daquela me din que algún día os faría eu na casa non o crería.

Doces?

2011-09-11T21:30:00.003+02:00

Estes pementiños son guindillas doces. Malia o seu ameazante aspecto suponse que non pican.
Suponse.

Gardo esta presada para semente.

Queixo 3, día 1

2011-09-11T11:40:00.001+02:00

Redondo e branquiño. Pesa 522 g

Bo proveito!

2011-09-10T17:09:00.005+02:00

Fixen pan para aproveitar o soro que gardara dos queixos da semana pasada. Para aproveitar a calor do forno mentres se cocía o pan, como había espazo metín tamén unhas patacas. E aproveitei que tiña as patacas asadas para probar a remolacha que leva quince días fermentando na súa salmoura.
Bo proveito!

Pan integral con soro de leite

2011-09-10T11:42:00.006+02:00

INGREDIENTES
1 Kg fariña de trigo integral (RdS)
70% soro de leite que me sobrou do queixo
0,9 % lévedo
1% sal

PREPARACIÓN
Mesturo todo e amaso 3-4 min
Deixo levedar 1.30 h, divido en dous, formo e coloco nos moldes.
Deixo levedar 1.30 h máis.
Boto un vaso de auga no forno e enforno 50 min a 200ºC e 10 min máis fóra dos moldes.

Carquinyolis

2011-09-09T15:53:00.004+02:00

Adaptación da receita do sogro de Cecília. Ricos, ricos.

INGREDIENTES para unha bandexa ben chea
250 g fariña (e algunha máis que engadín logo)
125 g azucre amarelo areado
1 ovo
5 culleradas de soro de leite (foi demasiado)
150 g améndoas crúas con pel
1 culleriña de lévedo químico
raspadura de limón
auga de azahar

PREPARACIÓN
Mesturar os ingredientes secos por un lado e os húmidos por outro. Xuntar todo e incorporar as améndoas. É unha masa branda e pegañenta.
Enfariñar a mesa e formar dous barrotes.
Enfornar a 180ºC uns 25 min
Cortar en rabanadas e estender na bandexa (mellor na grella, pero caían todos) uns 15 min máis (dar volta á metade), ata ficaren douradiños.

Con música de fondo.

Queixo 2, día 6

2011-09-09T15:49:00.002+02:00

397 g a día de hoxe. Cheira a queixo e comeza a ter pinta de queixo :)

Queixo 1, día 8

2011-09-09T15:48:00.002+02:00

Menos mal que fixen dous.

Tomaten groentesoep met kaas

2011-09-08T16:08:00.005+02:00

Unha noite de inverno hai unha chea de anos unha colega holandesa convidounos a unha reconfortante sopa que preparara na cociña común de Vančurová. Esquecín o nome da rapaza, o da sopa non: tomatogrúnesup, pareceume entender daquela.

Aproveitando que tiña verduras da horta e queixo caseiro, fíxena hoxe para xantar.

Paciencia

2011-09-06T21:44:00.004+02:00

Velaquí 4,325 Kg de repolo que dentro de dous ou tres meses serán chucrut.

Bueno, bonito, barato

2011-09-06T16:19:00.001+02:00

Morcilla cordobesa, chucrut de lombarda, puré de mazá.

Almorzo de domingo

2011-09-04T09:55:00.003+02:00

Pan caseiro, tomate da horta e un aceite excepcional: Cladium, D.O. Priego de Córdoba. De luxo.

Queixo 2, día 1

2011-09-04T09:51:00.003+02:00

Irmán do anterior, este pesa 450 g. Ámbolos dous cheiran moi ben :)

Reciclaxe

2011-09-03T12:43:00.005+02:00

Tiña gardado no frigorífico un anaquiño de masa que sobrou do apple pie e ocorréuseme facer unha quiche con el. Era moi pouca masa, demasiado pouca. O que saiu aseméllase moito máis a unha frittata que a unha quiche, pero está bó.

E co soro do queixo fixen un pan de molde que podía ter formado un pouco mellor...

Queixo 1, día 1

2011-09-02T18:41:00.003+02:00

Con esta sinxela receita (grazas, Miolo) e 2,5 L de leite Leyma pasteurizado fixen onte á tarde este queixiño. Hoxe pesa uns 340 g. A miña intención é deixalo madurar un pouco e non probalo ata dentro duns dez días. Veremos.

Dozura

2011-08-30T20:15:00.000+02:00

Apple pie (versión libre e feita un pouco a ollo desta receita clásica)

e un non menos clásico biscoito de cabaza (receita aquí).

Non adoito preparar doces, pero é que non todos os días volta á casa unha persoa querida, coma hoxe.

As mazás e a cabaza son da horta. A cabaza é a primeira da tempada, que sempre fai unha ilusión especial.

(Sospeito que o cheiriño a doce e a canela chega ata o portal).

As cousas boas do verán

2011-08-28T12:03:00.001+02:00

Guisote de bonito. Gloria bendita.

Unha boa parella

2011-08-19T21:59:00.003+02:00

Para rematarmos ben as vacacións, unha boa parella asturiana: pan de escanda e queixo gamoneu.

Bocata en Somiedo

2011-08-18T18:58:00.004+02:00

Nos lagos de Saliencia.

Bocatas en Mampodre

2011-08-18T18:52:00.005+02:00

Un bocata:e outro bocata:

Sorprendeume atopar pan candeal en León, non estaba malo. O pan escuro que o acompaña nesta foto é un pan sueco especiado que levei para almorzarmos no camping, este é un pan ideal para levar de viaxe: compacto, ocupa pouco, aguanta ben o paso dos días e está delicioso.

Pain à Laruns (2)

2011-08-05T10:18:00.005+02:00

Hier, une fougasse et un pain traditionnel:

Aujourd'hui, un pavé et un petit paysan (avec du seigle!):

Bocata nos Pirineos (cinco anos despois)

2011-08-04T20:06:00.002+02:00

Esta foto chega con cinco anos de retraso: a outra vez que estivemos no Ibón de Anayet as baterías da cámara chegaron tan esgotadas coma nos (daquela subíramos pola Canal Roya) e non puidemos facer ningunha foto. Hoxe tivemos ocasión de regresar a ese marabilloso lugar e desfrutar alí dun fantastico bocata de pan francés.

Pain à Laruns

2011-08-03T11:08:00.005+02:00

Chaque matin, ici à Laruns, j'achete le pain pour la journée. Hier, une baguette poolish et un pavé:

Aujourd'hui, une bergère et un mitron:

Bocata nos Pirineos

2011-07-31T21:31:00.002+02:00

Nos Lacs d'Ayous, case 2000 m de altitude e o Midi d'Ossau ao fondo. Non teño palabras para describir tanta beleza.

Bocatas en Irati

2011-07-28T21:28:00.004+02:00

Un...
... e outro.

Sen complicacións

2011-07-16T20:34:00.004+02:00

Esta fin de semana non tiña tempo nin ganas de liarme e fixen un pan sen complicación ningunha.

INGREDIENTES para dúas pezas duns 800 g cada unha
400 g fariña de trigo integral (Rincón del Segura)
400 g fariña de centeo (Rincón del Segura)
320 g masa nai de trigo integral e centeo
608 g iogur [80%]
45 g auga (engadina porque a masa pedía máis líquido)
23 g sirope de cebada malteada (que non se lle nota)
14 g sal [1,5 %]

PREPARACIÓN
Mesturo todo agás o sal. Autolise 30 min
Engado o sal e amaso uns 5 min
Deixo levedar 1 h
Divido a masa en dous, formo sobre a mesa mollada e coloco nos moldes engraxados. Cúbroos con sementes de sésamo e pulverizo auga.
Métoos no frigorífico unhas 13.30 h
Saco e deixo temperar 1.30 h
Pulverizo unha pouca auga sobre o pan e enforno 1 h a 200ºC , os últimos 10 min fóra do molde.

Simplest homemade granola

2011-07-16T12:20:00.004+02:00

INGREDIENTS
120 g rolled oats
120 g raw almonds, skinned and chopped
50 g sesame seeds
200 g brown cane sugar
ground cinnamon
pinch of salt

PREPARATION
1. Mix.
2. Bake.
3. Enjoy (preferably in the open air and surrounded by forests and high mountains).

Xeado de pan

2011-07-14T17:47:00.004+02:00

Cun anaquiño reseso deste pan e outras cousas boas (nata, iogur, unha presada de améndoas, azucre amarelo portugués) fixen este sinxelo e delicioso xeado de pan.
Atopei a receita (a orixinal leva avelás) no fabuloso libro de Nigel Slater Tender, vol. II, p. 947. Tamén está aquí.

Brot

2011-07-07T20:29:00.003+02:00

Hoxe, pan alemán: Holzofenbrot e Schwäbisches Albbrot.

Flammkuchen

2011-07-05T22:01:00.003+02:00

Unha advertencia: consúmase con moderación, risco de michelín perpetuo.
A receita (máis fácil imposible), en Bons Focs.

Patacas!

2011-07-02T23:25:00.001+02:00

Plantei unhas patacas so polo gusto de velas crecer. Tres anaquiños axurumelados en cadansúas macetas. Hoxe, dous meses despois, atopei as plantas murchas e levantei a terra. Velaquí a colleita: 713 g de patacas.

Lomo de orza

2011-07-02T13:05:00.003+02:00

O Ganapanciño, que di que non sabe cociñar, de cando en cando nos sorprende con algunha delicia andaluza. Hoxe (se cadra animado pola calor) fixo un espléndido lomo de orza que semella saído da mellor taberna cordobesa. Ole.

O visio

2011-07-02T12:26:00.005+02:00

Isto do knäckebröd [ `knɛkːə~ˌbrøːd ] converteuse xa nun visio.

Se están feitos cunha boa manteiga, moitísimo mellor.

Whole-Rye and Whole-Wheat Bread

2011-07-02T11:53:00.003+02:00

Toma solaso!
A receita de Hamelman, Bread, p. 195-196, sen lévedo e coa tomasa completamente despendolada coa calor.

O mellor supermercado do mundo

2011-06-26T23:16:00.004+02:00

Aberto as vintecatro horas.

Gústame moitísimo este cestiño, tecido polo pai de Laura hai quen sabe cantos anos. Toda a froita que contén é agasallo dela.

Con cardamomo

2011-06-25T17:46:00.004+02:00

Gustoume tanto este pan sueco, que probei por primeira vez a semana pasada, que estaba desexando acabalo para facer outro. Hoxe engadín tamén un chisquiño de cardamomo.

Á maneira tradicional

2011-06-25T16:31:00.007+02:00

Máis pan á maneira tradicional. A receita é a de case sempre pero hoxe cocino na cocotte, por iso saiu así de bonitiño. Mágoa que nas fotos non se aprecie ben o ton dourado da codia.

INGREDIENTES para dous moletes*
750 g fariña de trigo do país (Panificadora Betanzos)
250 g fariña de trigo manitoba (La Finestra sul Cielo)
400 g masa nai de centeo branco
760 g auga [80%]
18 g sal [1,5%]

PREPARACIÓN
Autolise 30 min
Engado sal e amaso 25 min
Deixo levedar 3 h, cun S&F aos 60, 120 e 180 min
Frigorífico* unhas 10 h
Deixo temperar 2 h
Formo rapidamente.
Enfornado na cocotte* quente 240ºC 15 min tapada e 55 min a 200ºC co testo quitado.
Aseméllase moito ao pain au levain que comin en Francia.

* Dividín a masa en dous boles ao metela no frigorífico porque non tiña ningún grande dabondo para tanta masa.
Cocín a metade da masa na cocotte e o resto fóra, canda ela. O espazo no forno estivo moi xustiño.

Pan sueco de centeo

2011-06-18T17:25:00.005+02:00

Velaquí outra das interesantísimas receitas de Ibán no Foro del pan:

Con fiuncho, tona de laranxa confitada e unha cantidade irracional de melaza. Non puiden agardar a mañán para catalo: é unha delicia, todos os sabores combinan á perfección e, sen dúbida, mañán ha mellorar.

Aínda que prescindín do lévedo comercial, pasóuseme un pouco porque tiña o forno ocupado.

Pan de peso

2011-06-18T17:10:00.006+02:00

Fixen un pan con trigo do país como o da semana pasada. Saiu un molete tan alto que mesmo semella un pan de peso, dan ganas de cortalo en anacos grandes. O miolo é esponxoso e cheira ben.A verdade é que a forma é un pouco estraña (un coxín?).

A parte de abaixo ten un aspecto máis normal, de pan corrente.